ክሽገር ክጭነቕ ኣምላኽ ረዲኡኒ

ካብ ዓዘቕቲ ጸልማት ኣናጊፉኒ

ብዓቢ ብርሃኑ መንገዲ መሪሑኒ

ኣብቲ ልሙዕ ሸኻ ኣውዒሉኒ

ንከለይ ፈቲሑ ደስታ ኣዕጢቑኒ።

በይነይ ከይመስለኒ ኣጸናኒዑኒ

ኣብ ጊዜ ፍርሓተይ ኣተባቢዑኒ

ኣነ'የ ኣምላኽካ ኣጆኻ ኢሉኒ

ቲ ዘለኹ'የ ኢሉ ስሙ ነጊሩኒ

ብዘይጠፍእ ቆጥቋጥ ኣብ ሲና ተራእዩኒ።

ኣብ ምድረበዳ ንሱ ኔሩ ምሳይ

ኣብቲ ጎቦታት'ውን ኔሩ'ዩ ኣብ ጎነይ

ከይጠሚ ከይጸምእ ንሱ ይሓልየለይ

ጸልማተይ ቀንጢጡ ብርሃን ይገብረለይ

ክሰርሕ ክዓዪ ርእየዮ ኣምላኸይ።

ነቶም ዝጽበይዎ ሰናይ ይኾነሎም

ንኽህልውዎም መላእኽቱ ይሰደሎም

ኣእዳዉ ዘርጊሑ ይቀባበሎም

ብውሑድ ተኣሚኖም ኣብ ብዙሕ ይሸሞም

ኣእምሮ ዘይሓለኖ ሃብቲ የካፍሎም።