ተመስገን ክብለካ ኣንቂደ ካብ ልበይ

ተባረኽ ክብለካ ኣልዒለ ደሃየይ

ክብሪ ምስ ምስጋና ከቕርብ ኣብ ዙፋንካ

ከምልኽ ክሰግድ ዕጣን ክዓጥነልካ

ንዓመታት ብእምነት ከገልግል ኣብ ቤትካ

ብቕንኣት ክጎዪ ንድሕነት ነፍሳትካ

ካባይ ኣይኮነን ካብ ክእለተይ

ብጸጋኻ`ዩ ኮይኑ ዓወተይ

ሳላ ሓይልኻ ደው ኢለ

ሳላ ደገፍካ ተበራቲዐ

ጥዑም ኢዩ ምንባር ኣብ ኣጸድካ ኣምላኸይ

ንሰናየይ ኮይኑለይ `ቲ ኩሉ ድኻመይ

ካብ ሃብትን ስልማትን ይምረጽ`ቲ ማሕደርካ

ሰላምን ዕረፍትን ኣለዎ ዙፋንካ

ምሳኻ መሪጸ ጠንጢነያ ዓለም

መንገደይ በሪሁ ተቐንጢጡ`ቲ ጸላም

ነዚ ኩሉ`ውን ምስክር`የ

ዝገበረለይ ከውርዮ`የ

ዝሓባእክዎ ኣብ ልበይ

ይደፍኣኒ`ሎ ፍቕሪ ኣምላኸይ

ካብ ሽሕ ዓመታት ምንባር ምስ ረሲኣን

ይበልጽ ኣብ ቤት ኣምላኽ ሓላዊ ደገ ምዃን

ነዚ ፈሊጣ ነፍሰይ ጠሚታ ናብ ጎይታ

ብሃብቲ በረኸቱ ከጽግብ ድሌታ

ንዑ ናብ ቤት ኣምላኽ ሓቢርና ንገስግስ

ንተንስእ ንለዓል ንጥፉኣት ክንመልስ

ሓልዮትና ኩሉ ናብኡ ኣውዲቕና

ንዑ ንስዓቦ ዘሎና ሼጥና

ሰማያዊት ቤት ንኽንወርሳ

ምድራዊት ቤትና ንቐድሳ