ኣብዚ ሕሉፍ ዕምረይ ዘሕለፍክዎ

ላዕልን ታሕትን ኢለ ዘጥረኽዎ

ሓደ'ኳ ኣይወነንኩን ባህ ዝብለኒ

ስስዐ የዒንተይ ጎልቢቡኒ

እንትርፎ ክሳራ’ምበር የለን መኽሰብ

ብምባል ንብሕተይ እንክሓስብ

ሃንደበት መንገድኻ ረኸብክዎ

ጉዕዞይ ክፍልም እግረይ ኣንበርክዎ

ናይ እምነት መንገደይ ስኢነዮ

የማን ጸጋም በልኩ ከለልዮ

ምንባር ኣብዛዓለም ኣጽሊኡኒ

ጣዕሳ ኮይኑ መግበይ መሪሩኒ

ሳላኻ ግን ሳላ ሓያል ኢየሱሰይ

በኣኻ’ወ ተሓዲሱ መንፈሰይ

ካብ ማሕዩር ዓዘቕቲ ሞት ኣውጺእካኒ

እነኹ’ኳ ይዝምር ባህ ኢሉኒ

ዕላማ ምፍጣረይ ኣቕለብኩሉ

ኢየሱስ ከም ንጉሰይ ኣመንኩሉ

እንካብ ሽዑ ልበይ ተሓጒሳ

ንዕኡ ተመስግን መመሊሳ

እንቛዕ እኳ ኣይኮነት ኣብ ዕርበቱ

ሕይወተይ ምስ ጠፍአት ብኸንቱ

ብኣጋ ኣድሒንዋ መድሓንየይ

ስለዚ ይመስገኖ ፈጣርየይ