ኦ ጎይታ እቶም ክልተ ንኤማሁስ ዝጓዓዙ ዝነበሩ ደቂ መዛሙርትኻ

ጎይታ ጽሓይ ዓሪባ እያ’ሞ ምሳና ሕደር ኢሎም ከምዝለመኑኻ

ንሕናውን ሎሚ ጎይታ ሓደ-ሓደ ግዜስ ቀትሪ ከሎ መሲዩና፡ ጽልግልግ ኢሉና

ኣዝዩ ዓሪቡና ይርከብ ኣሎ’ሞ ብሕያውነትካ ራሕርሓልና

ከም ዕቤት ምሕረትካ ድኣምበር ከም ብዝሒ ሓጢኣትና ኣይትኺደና

ምሳና ንበር ባዕልኻ ጓስየና፡ ኣብ መኣድኻ ከም ንሓብር ግበረና።

መንገድና ጸልማት ይመስል ኣሎ

ጽልግልግ ዝበለ ድነ ሞት ዝዓሰሎ

ገዲፍካና ኣይትኺድ ናብ ማዕዶ ኣይትሳገር

ንዓ ድኣ ሎምስ ምሳና ተደረር።

ልዕሊ ኵነታት ክንዝንቢ ብተስፋ ብእምነት

ትርጉምን ዕላማን ከነልብሳ ንሕይወት

ብጊዜያዊ ነገራት ከይሽበር ልብና

ናብ ማዕዶ ክንጥምት ከነድምቖ ራእይና።

ሕያው እንከሎኻ ምርኣይ ክንስእነካ

እምነት ውሒዱና የለኻን ንብለካ

ካብ ስጋኻን ደምካን ተፈሊና ጐይታ

ብደረቕ ምድረ-በዳ ነፍስና ሃውቲታ።

ንዓ ንዶ ኢየሱስ ምሳና ሕደር

ክገሃድ ክግለጽ ቲ ሕቡእ ቲ ስቱር

ንቓልካ እንዶ ግለጾ ልብና ኣንድዶ

ብስጋኻን ደምካን ኣዒንትና ክፈቶ።