ንቤተይ ንዒቕካ ጥንቆላ ኣሚንካ

ዓይናኻ ዓሚትካ ስራይ ተኸቲልካ

ኣምላኸይ ኣምላኸይ ትብለኒ ብኣፍካ

ሰብ ክፈትሖ ሂብካዮ ንሽግርካ

ኣይፋልካን ወደይ ቀናእ ኢየ ኣምላኽካ

ደጊምሲ ተመልስ ንሱ ይኣኽለካ

ብግብርኻ ንቤተይ ኣርኪስካ

ብምሕረተይ መሊስካ ሻዲንካ

ንኹራ ዶንጓይ ንምሕረት ቁልጡፍ

ሙዃነይ ረሲዕካ ካባይ ዓቢኻ

ንኸይተመኽኒ ቃለይ ኣንቢብካ

ንኸይትምለስ ልብኻ ሰዊርካ

ወደ’የ ተመለስ ምሕረት ክህበካ

ወይለኻ ኣታ እትፈርድ

ወይለኻ ብኣፍካ እትኹንን

ነፍስኻ ንሲኦል ኣይተድንን

ዓይንኻ ዘሎ ገፈል ከይረኣኻ

ከመይ ኢልካ ትርኢ በሰር ሓውኻ

ጸሓይን ብርሃንን ከይጸልመቱኻ

ዘክሮ ንኣምላኽካ ጠምት መጻኢኻ።

ተመለስ ወደይ ብግዜኻ ኣይትጻወት

ሰይጣን ብኣኻ ከይዕወት

ጽባሕሲ ናተይ ኢያ ናትካ ኣይኮነትን

ኽፍእን ክትገብር ኢልካ ኣይትሓልን

ካብቲ ቅዱስ ቤተይ ቤት ስራይ ጥንቆላ ዓብዩካ

ሰብ ክፈትሖ ኣብ ሓይሉ ኣሚንካ

ኣምላኸይ ኣምላኸይ እና በልካ ብኣፍካ

ንቅዱስ ቤተይ ብሓጥያት ኣርኪስካ

እረ ክሳብ መዓስ ኢኻ ብኽልተ እግርኻ ክትሕንክስ

ዘክሮባ ደመይ ምእንታኻ ክፈስስ

ግደፍ ግደፍባ ወደይ ተመለሰኒ

ድሌተይ ኣይኮንን ክትርሕቀኒ

ኣምላኸይ ኣምላኸይ በለኒ ብልብኻ

ብዘይካይ ካልእ ምልኪ ኣይሃልኻ

ሽዑ ኢየ ዝከብር ኣነ ብኣኻ